Monthly Archives: Augustus 2011

Valuasie

Valuasie

Iewers in 2009

 

Die rafeling het seker lank begin

en eers so lig geskilf dat g’n kon sien

tot dit eintlik nou  te laat is.

Kyk hier, die meesterkering

(soos ons dit noem)

is uit sy matriks los –

die tekstuur begin reeds uit te klos

op plekke, hopeloos en onherstelbaar

(sien hier die deurgeskotenheid)

en kyk byvoorbeeld hier

die dowwe kolle: die kleur is weg,

dis feitlik leweloos,

die kuns totaal verlore –

dis net die beeld van wat dit was.

So dis regtig jammer,

‘n tragiese verlies,

die wesenlike waarde weg.

Aanvaar dit maar, bewaar

wat kan want

geen vakman sal vir jou kan red nie.

Advertisements

Rx 20min qd

Rx 20min qd

gaan sit by die see

gaan gee jou oor

aan sy gedruis

en hóór:

daar is min

wat sy geraas

nie sal genees nie

Tegniese nota:
die oomblik dat die meester kortikale beheer 25%
minder stroom vra (dit kan wissel)
en die G-RAS(t) [gekombineerde RAS telling]
na die derde pieng steeds onder 0.35 is
word alle bewerkingsvlakke bevorder met 1
en as die AB(f) [aktiewe bewussynfaktor] vir nog 100
sekondes of so negatief bly, moet talamiese beheer
noodwendig die surplus na subliminale prosesse roeteer:
die aansienlike besparing word gebruik
om die mees beheerde banke te herskemetiseer
(gewoonlik reekse gemerk ZZA – ZZZ)
– sowel as om die affektiewe vektore aan te pas
by die huidige meer geïntegreerde eméme –
die verminderde beheerlading op hierdie banke
bring ‘n energie-surplus teweeg wat kortikaal
(en elders) beskikbaar gestel kan word –
‘n wen-wen dus, as die proses maar net begin is