Category Archives: Digsels en bidsels

Verskeie vrae oor my kop en skouers

(Een wat ek nog nie geplaas het nie)

Verskeie vrae oor my kop en skouers

5 Junie 2016

 

Waarom wil jy op jou skouers ‘n las dra wat die ewige God

op sy almagtige skouers wil neem? Bid! Dank! Gee oor! 

CH Spurgeon

 

Hemelse Vader,

vrees hierdie vrees dalk verlies van dit wat te belangrik is:

my vrou, my werk, gesondheid, kinders?

Is hul my waarde, MY waarde? Is hul narsisties aangeheg,

geïnkorporeer as wie ek is, my identiteit? Is ek dít?

Die wanliefde van ‘n swak ego, dus – nou oorbehep, afhanklik?

Of het ek man en vrou en kinders, ouers, gesondheid, werkvermoë

liewer as vir U – soos ‘n onwaardige? Moet ek dus nog kruis toe,

moet ek daardie EK nog sterf, of moet ek dááraan sterf soos pa,

wat sy kinders aan U ‘afgegee’ het – een krisisnag?

Of soos Jim Elliot (who gave what he could not keep to gain

what he cannot lose): toe hulle sê Jim Elliot het gesterf,

sê Elisabeth nee hy’t jare terug gesterf, net God het dáár geleef?

HOE sterf ek, HOE gee ek af? HOE word U alles, ek niks nie?

Ek begeer om alles af te gee en niks te word, te voel nie, Heer,

die vrede vol vertroue te beleef, to laugh the laugh of faith,

maar weet nie HOE nie; om dit net te sê, te bid is niks – dit help nie –

en Spurgeon het dit mis, want dieper, dieper lê die vrees, die vlees:

katekse, vasgestrengel in limbiese strukture, verwronge sielegroeisel,

maar U kan opereer, o Gees? Die skerp, skerp swaard, u skalpel

kan tussen siel en gees, waar dit gedy, die kwaad uitsny?

(Verdoof my droomloos tog net eers met barbitoon voor U genees!)

Immers kan ‘n mens homself nie kruisig nie, jy gaan maar daarop lê,

as good as dead, sê ons – of neem dit daagliks op, jy dra dit agter U;

jy moet WIL oorgee, afgee, dit bely, dis al – maar U, U Here,

moet dit aanvat, afvat, op U skouers vat, my los met die

vrede van die vlam van dié votiewe kers wat flikker, flikker,

in die stilte van belangeloosheid (as net vir U) –

‘laat gebeur wat sal gebeur, want God is in beheer’.

O God, maak ons kinders van die stilte,

erfgename van u vrede (Clemens, 1ste eeu).

Maar ek weet eerlik nie of DIT die doel is, Heer, want

om die pyn te sny, die vrees, moet U in die lewe gaan,

die liefde ook verwyder, die passie, omgee daarmee saam,

die vlees is half al met die Gees vergroei,

die mooi en skoon is met die donker en die sleg vervleg,

die liefhê en die lyding saam verdraai –

immers is dit net die liefde wat kan ly.

Die lewe bly dus

beíde

en moet dus so geleef word.

En al dié vrae moet gedra word

op my skouers, in my kop,

maar ek het ‘n God en

ons kan daaroor praat.

Amen.

Advertisements

U wil geskied

U wil geskied

26 November 2017. Die dag van die Here.

 

Op hierdie Sondagmôre, Here:

“laat U wil geskied”.

 

Ek bid nie vir u toelatende wil nie, want dit geskied al reeds.

Daar gebeur immers niks wat die Almagtige nie toelaat nie –

oues vermoor, kinders geskend, diere seergemaak, goeies uitgewerk,

slegtes het ryk geword – sonder disrespek, Here, maar U

het vir dit alles, vir nóú, “ja” gesê.Dis soos dit nóú sal wees –

nóú is die aarde, dán is die hemel. Ek verstaan dit, maar ook nie.

Maar ek bid nie vir dáárdie wil nie.

 

Ek bid vir u volmáákte wil: “soos in die hemel, so ook op die aarde”.

Waarheen U op pad is, Here, met ons, dáárdie wil! U koninkryk se wil, Here,

wat moet kom: in ons land, ons mense, ons lewens – in my lewe: ja, wat is

u hémelse wil vir my? Tog nie stryd en spanning nie? Misverstande,

persoonlikhede wat so bots? Nee, tog waters waar rus is, goedheid en guns,

“al die dae van my lewe”, Here, hierdie lewe, op hierdie aarde –

nie net ééndag, dáárdie dag nie.

 

My kop sê “hemel is hemel en aarde is aarde” (en nog te veel ander dinge),

maar my siel het iets gekliek, verstaan, besluit – so ek bid onwrikbaar voort

“soos in die hemel, só ook op aarde”. Dis mos Christus se genade?

 

Ja, dáárvoor bid ek dan hierdie sonnige en deurmekaar môre.

Amen.


5 November 2017

 

5 November 2017

Op die Dag van die Here, in Tulbagh by die dam

 

Vader in die hemel, ek eer U vandag

vir hierdie blougrys berge, massief, majestueus,

vir die groen vallei, wit huisies hier en daar gedot,

en die warm windjie wat die riete wieg hier om die dam,

die voëltjies wat kom waterskep – kyk na die voëls

van die hemel, hulle saai nie en hulle maai nie;

maar tog voed julle Hemelse Vader hulle

dankie vir elke seëning wat ek van U beleef!

Laat u koninkryk in my lewe kom, veral daar

waar U nie reeds regeer nie (ek weet waar dit is)

en kom ook déúr my, Koning: as iemand tog

my skryfgoed lees, mag hul nader aan U kom,

mag hulle hart en lewe méér aan U behoort!

Laat u wil geskied, Here: maar nie net

u toelatende wil nie (dié geskied al reeds),

u volmáákte wil – soos in die hemel,

so ook op die aarde – u droom vir ons, vir my,

wat seën en glimlag, wat heel, herstel,

wat u hemel in my wêreld bring.

Gee my vandag vandag se dinge: krag, gesondheid, geld;

U ken my behoeftes beter as ekself, maar ek het mos

besluit om in geloof te vra vir méér, Here,

vir die beste, vir u volmaakte wil (en waarom nie,

U’s mos my Vader), maar ten minste méér as nou.

Vergewe my my skuld, my sonde, vrees en ongeloof

en vir als wat nog op ons agenda is, ek weet daarvan –

nes ek elke grief vergewe, die seerkry en ontsteltenis

– ek laat dit gaan in Jesus’ Naam – en help my

om versoekings te vermy, want ek’s versoekbaar,

Vader; help my na oorwinning toe!

Verlos my van die Bose. Ek weerstaan weereens

sy boosheid. Hy het by my geen mag nie, selfs my sonde

gee aan hom geen houvas nie, amen – ek is verlos!

Maar aan U Here, aan U – aan U, my Vader…

aan U kom toe die koninkryk,

die krag, die heerlikheid

– the power and the glory –

tot in ewigheid!

Amen.


Ierse Seën

Mag die pad voor jou gelyk raak,
mag die wind van agter waai,
mag die son op jou gesig wees,
en milde reën jou veld besaai –
en tot ons weer ontmoet,
mag God jou in die palm van sy hand bewaar.

My weergawe van die Irish Blessing. Wou nie te veel afwyk van die oorspronklike nie en ook sy ritme behou. Nogtans is dit moeilik – ek soek eintlik beter rymwoorde. En om met die son op ons gesig te reis is dalk iets anders as wat die Iere in gedagte gehad het!  Iemand kan sekerlik hierop verbeter!

(ek sal weer skryf, maar is dag en nag besig met ‘n manuskrip – ek kla nie!)

Irish Blessing


Opstanding-refleksie by die dam

Opstanding-refleksie by die dam
Paasfees, 16 April 2017

Christus het opgestaan!

Maar wat beteken dit, o Heer? Wat is “op-stan-ding”?
Opstanding is mos ‘n opstand-ding teen die dood.
Opstanding is lewe in die dood en deur die dood –
dis lewe téén die dood in! Dis om teen die wat-ook-al
te staan en hierdie fris en koel suidoosterwind so
diep as moontlik in te asem (God se asem haal) en
hierdie piepklein blommetjies om my raak te sien, te
bestudeer (ja sowaar, en dit in hierdie droogte) en
te besef dat hierdie dam nog net so laag-laag lê as
wat dit laasmaand was, dit het dus nie nóg gesak nie en
die reën is soveel nader, so daar’s genade wat
genoeg is vir ‘n doring-in-die-vlees bestaan en
daar is hoop dat dit sal reën, herstel, genees; hoop
vir ommekeer, vir seën. Dit kan werklikwaar gebeur!
Opstanding is in my kop as ek met wargedagtes
na my Vader gaan (van die vark se peule na die fees
was één besluit gewees toe die seun dít sien vir
wat dit is: dat hy ‘n kind is van die Vader) en ek besef
so lief het God sy Seun gehad dat Hy die lewe gee
vir Hom selfs in die dood, sodat elke een wat eweneens
(ek’s mos ook ‘n kind) na Hom wil gaan, kan kom
en oorvloed vind en geen vorm van die dood sal vrees.
O Gees wat kragtig is, laat my, opstandeling, bely:
dié dam SAL vol loop, dié lewe SAL oorvloedig wees,
in geloof is dit reeds fees: dis tyd vir die oorwinning,
want dís die opstanding!

Hy het waarlik opgestaan!


kruis Kruis

kruis Kruis

Lydenstyd-refleksie

8 Maart 2017

As

jy

aan die Vaste deelneem

is dit moeilik

(en van koffie vas die moeilikste!)

en lánk maar

daar is wel een seën

jy sal jou mislukking sien

jou nie-opdaag-in-jou hart

jy’t gedog gewou dog nie gebid gegee

maar toegeplak met pleisters

van klein-klein kruisigings

jou sonde-aard nog nét so baar

en jy sal weet waarom

Hy

dan

dáár moes hang

en wat genade werklik is


Nog vrae, Here

 

As ‘n man u Naam bely en hy

versigtig leef, en dit en dat vermy

wat U nie sal behaag nie

(rook, drink, dobbel, vloek)

en tyd maak om te bid

en in u Woord U soek –

en as ‘n ander man sê hy glo ook,

maar harder leef en vloek

en hom minder steur aan reëls

en sê “God alleen kan oordeel,

los dit tussen Hom en my”

en ek by hom meer liefde kry

vir ander mense: is

SY God nie groter,

SY geloof nie regter, égter nie?

Die verkeerde een wat lief het,

is regter as die een wat reg het,

maar glad nie God se liefde wys.

Dit los my nog met baie vrae…