Jim Seybert – Leadership RE:Vision (Tyndale, 2009)
As jy klaar is met Maxwell (en ek het alles gelees en aangebied wat hy doen) soek jy iets anders/meer oor leierskap. Moenie ‘n fout maak nie, ek dink Maxwell lê die fondasie goed en elke Leadership 101 sal na hom verwys. Dit gesê, ek dink Maxwell is nog in die ou skool van leiers wat tog maar glo leierskap is “groot” leierskap, dit wat “dinamiese” leiers doen. Kom ons wees eerlik – sulke “sterk” leiers lees nie eintlik boeke oor leierskap nie: die krag van hulle hoë D persoonlikheid is vir hulle genoeg. Ja, ek dink dis die “mindere” leiers onder ons wat boeke lees om “beter leiers” te wees. Die konsep van leierskap het egter tereg uitgebrei na al die ander mense se leierspotensiaal ook – “tereg” want die wêreld is op ‘n koers weg van “groot” leierskap as dit enigsens monolities, monopolisties of manipulerend is. Leierskap is op pad na insluitende en fasiliterende leierskap. In elk geval, sonder leierskap sal niks gebeur nie (soos Maxwell sê) en daarom sal leierskap ‘n tema bly. Ek het gedink Seybert gaan verby die bg. tradisionele leierskapgoed, en hy probeer. Hy spreek praktiese issues oor leierskap aan. Hy probeer tradisionele praktyke ondergrawe, wat sin maak op ‘n post moderne manier. Maar hy val ook in dieselfde strik as Maxwell deur regtig obvious goed te lys – en van sy “ondermynende” gedagtes is in elk geval al die nuwe norm, sou ek sê, by groot organisasies. Onthou my tog dat ek in ‘n kursus oor leierskap nie op vanselfsprekende goed dwell nie (en ek is besig om voor te berei vir so ‘n kursus, dis hoekom ek die boek lees). Ek sal sy dertig kort hoofstukke net so in een sin of twee opsom op my eie manier:
#1 Moenie tyd mors nie – as ouens nie agter die visie inval nie, kan hulle nie langer deel van die span wees nie. Dis beter dat hulle aanbeweeg (vra hulle mooi) as dat hulle aanhou dwarstrek.
#2 Die kliënt is nie altyd reg nie – onbeskofte en onredelike mense hoef nie gepamperlang te word nie. Stap die pad eerlik so ver as moontlik saam met hulle, en trek dan ‘n streep. Genoeg is genoeg.
#3 Moenie suinig wees met jou mense nie – Christelike organisasies betaal dikwels die swakste omdat dit “oor die Here gaan” en verarm hulle werkers. Wat ‘n swak getuienis – wees net redelik!
#4 Moenie jou mense oorwerk nie – in vandag se tye van besnoeiings moet drie mense vyf mense se werk doen, en hulle self gelukkig ag. Beter tydsbestuur gaan nie help nie – wees net redelik!
#5 Almal maak foute – hulle gaan foute maak en hulle gaan dit of wegsteek (soos Adam en Eva) of vertroue hê om daarmee te deel. Wees goed met jou contingency plans, maar onthou die mens kom voor die wins.
#6 Sê duidelik wat jy wil hê – as jy nie, gaan hulle doen wat HULLE wil hê, en dit gaan JOU skuld wees. Sommige raas net oor dit wat hulle NIE wil hê – dit is eintlik swak leierskap. Wat is die doel?
#7 Betaal die prys of los dit – soms wil ons so hard onderhandel dat daar vir die verkoper niks meer in is nie. Betaal ‘n redelike prys – onthou, mens is altyd die belangrikste item in die vergelyking.
#8 Dra gesag oor – dikwels delegeer ons take, maar sonder ‘n duidelike mandaat of outoriteit. As jy delegeer, delegeer ‘n duidelike outonomie of los dit as jy hom nie vertrou nie. Bemagtig mense.
#9 Sê die slegte nuus – om mense te laat verstaan alles is reg, net om hulle later te fire omdat hulle dit nie maak nie, is bedrieglik. Kry ‘n manier om dood-eerlik en steeds aanvaardend te wees.
#10 Pas op vir die “Paradoks van Sukses” – as iets in die verlede gewerk het, is dit geen waarborg dat jy nou ‘n kenner is, of dat dit weer gaan werk nie. Bly oop, bly “onkundig” en vra aanhoudend goeie vrae: bv. “presies waarom doen ons nie beter nie?”
#11 Moenie net veilig speel nie – as jy net hou by wat laas jaar gewerk het, gaan jy nooit groei nie. Alle leierskap behels die neem van risikos – ons noem dit geloof.
#12 Leierskap is oor die toekoms – “vergeet” die verlede, behalwe as jy foute wil vermy. Stel goeie bestuurders aan vir die hede, maar moenie vasklou nie – leierskap gaan oor verandering.
#13 Verstaan wie jy is – ja, dit gaan oor JOU in die sin dat jy ‘n unieke mens en leier is en as jy nie jouself verstaan nie, gaan jy nooit meer JY word en God se doel bereik nie. Kom in kontak met jouself.
#14 Bestuur jou beeld – d.w.s. die beeld van die organisasie. Ongelukkig, in vandag se wêreld van informasie, moet daar konstante kommunikasie wees, en ‘n konstante stroom goeie nuus.
#15 Staan in die kollig – moenie hoogmoedig of magsugtig raak nie, maar as mense jou nie kan sien lei, gaan hulle nie volg nie. Wees DAAR, wees VOOR hulle – wees hulle leier.
#16 Aanvaar die verskille – ons moet leer dat ons gaan verskil, en ons moet verskille verwelkom. Wees sterk genoeg daarvoor – incestuous amplification is waar ons al hoe meer dieselfde taal praat en mekaar warm vryf met hoe reg ons eintlik is. ‘n Ander standpunt is dikwels die broodnodige korrektief.
#17 Moenie probeer wen nie – baie faktore is te buite jou beheer om nommer een te wees in jou veld. Wees eenvoudig eerder uitstekend in alles wat jy doen, en laat jy kom waar jy wil.
#18 Moenie te vinnig groei nie – om kompeterend te wees beteken nie om alles te doen wat ander doen nie, of om bloot groot te probeer wees nie. Moenie elke geleentheid aangryp nie. Hou jou energievloei dop, jou volhoubaarheid.
#19 Eet saam met die mense – ja, Seybert bedoel die leiers en bestuurders moet meer dikwels saam met die werkers eet. Dit bou vertroue en jy sal baie dinge leer oor jou organisasie.
#20 Droom drome – ons is dikwels net in die kei-harde wêreld van feite. Alles gaan egter oor innovasie en ons moet luister na diegene wat sê “Ek het ‘n wilde idee…” of “Kan ek iets heeltemaal anders voorstel?”
#21 Aanvaar die foute – die belangrikste oor foute is om die verhouding te behou en daaruit te leer. Foute wys op swak plekke in die sisteem. Hoe jy ‘n fout hanteer, sê baie oor jou volwassenheid. Beskerm veral jou jong leiers en lei hulle reg.
#22 Neem ‘n breek en rus – alle leiers moet gereeld wegkom en ook vir hulle werkers dieselfde geleentheid gee. Covey se Kwadrant II ens. Herstel, slyp die byl, ens.
#23 Kry ‘n goeie nommer 2 – dit gaan nie hier oor ‘n mentorling nie, maar oor ‘n chief of staff – jou uitvoerder, die een wat jou op hoogte hou, wat saam met jou reis, wat jou komplementeer, ja – wat dalk in opleiding is, maar nie jou kompetisie nie. Moenie ‘n lone ranger wees nie.
#24 Speel skaak, nie dambord nie – mik vir die langtermyn, nie die korttermyn nie. Daar moet short term gains wees, maar nie quick fixes, wat nie volhoubaar is nie. Mik om te build, nie net te bless nie (McClung)
#25 Volg JOU leier – en dit beteken die Here – bly in kontak oor jou taak, dit is immers jou roeping
#26 Laat hulle lag en sing – dis bewys dat mense wat die werkplek geniet meer produktief is. Dit moet dus standaard wees om sosiale dinge te reël, of om die reëls te verslap sodat mense net meer ontspanne is by die werk en dit geniet.
#27 Wees net meer vrygewig – geld, tyd, bonusse – sulke goed. Moenie hulle doodmaak met jou strengheid nie.
#28 Staan by jou waardes – besluit watter waardes is ononderhandelbaar. Bly ‘n waarde-gedrewe organisasie – om ‘n bietjie meer markaandeel te bekom en jou unieke voorsprong prys te gee maak of jou niche te verloor nie noodwendig sin nie.
#29 Bly in jou gawes – as jy in jou kragte bly, kan jy soos ‘n arend opstyg.
#30 Op watter terrein het God onlangs jou denke verander? God doen konstant nuwe dinge, en Hy inspireer ons konstant tot nuwe dinge – kyk maar in die Bybel vir die nuwe en verbasende dinge wat Hy onder sy mense gewerk het.
